पनौती
पनौतीमा सिटी गाइड तालिम शुरु भएको छ । पनौती भ्रमणका लागि आउने पर्यटकहरुलाई स्मारक क्षेत्रको विषयमा जानकारी दिने जनशक्ति उत्पादनको उद्देश्य सहित तालिम कार्यक्रमको आयोजना गरिएको आयोजकले जनाएको छ ।
तालिम कार्यक्रमको आयोजना पनौती पर्यटन विकास केन्द्रले गरेको छ । मंगलबारबाट सुरु भएको तालिम कार्यक्रम ७ दिन सम्म संचालन हुने छ । पनौती नगरपालिका वडा नं ७ स्थित ज्ञानविकास पुस्तकालयमा संचालन हुने तालिम कार्यक्रमको पनौती नगरप्रमुख रामशरण भण्डारीले उद्घाटन गरे ।
तालिम कार्यक्रमको उद्घाटन गर्दै भण्डारीले पनौती घुम्न आउने पर्यटकले पनौती क्षेत्रको मौलिक संस्कार र व्यवहार बुझ्नु पर्ने भन्दै तालिम पछि उत्पादित जनशक्तिले उक्त आवश्यकता पूरा गर्ने विश्वास व्यक्त गरे ।
पनौतीमा भएका संस्कार संस्कृति तथा सम्पदाहरुलाई विश्वभर चिनाउनु पर्ने भन्दै भण्डारीले आफूसधैं पनौती क्षेत्रको विकासका लागि सकारात्मक रुपमा लागि परेको जिकिर गर्दै पिता पुर्खाको चिनारी संरक्षणको दायित्व आफूहरुको भएको बताए ।
पनौती पर्यटन विकास केन्द्रका अध्यक्ष पुरुषोतम् कर्मचार्यले पनौती स्मारक क्षेत्र क्षेत्रफलका अधारमा सानो भए पनि प्रशस्तै सम्पदाहरु रहेका बताए । यहाँका शिला इँटा देखि सबैको आफ्नो महत्व छ । पनौती अवलोकन गर्न आउनेहरुले यो सबै बुुझ्न जरुरी रहेको बताए ।
तालिमबाट उत्पादित जनशक्तिले त्यसको महत्व विश्वभर पुर्याउन सघाउने उनको भनाई थियो । पनौतीको भूमिमा आउने विदेशी पर्यटक प्रत्येक विषयको महत्व तथा पहिचान बुझाउन सजिलो होस भनेर तालिम कार्यक्रमको आयोजना गरिएको उनले बताए ।
तालिममा पनौती क्षेत्रका २० जना युवाहरु सहभागी छन् । सहभागीलाई प्रशिक्षक सामाजिक अभियान्ता अनिल चित्रकार नुवाकोट दरबार स्मारक क्षेत्र संरक्षण हेरचाह प्रमुख सुनिल पाण्डे लगायतले प्रशिक्षण दिने छन् । तालिम उद्घाटन कार्यक्रममा कार्यक्रममा, संस्कृतिविद, पर्यटन,लगायत स्थानीय समाजसेवी बुद्धिजिवीहरुको उपस्थिति रहेको थियो ।
