चितवन
शुक्रबार बिहान मुग्लिन नारायणघाट स्थित सिमलतालमा लेदो सहितको पहिरोमा परि त्रिसुली नदीमा बेपत्ता यात्रुसहितको दुई सवारी साधन शनिवार अवेर सम्म पनि फेला पार्न सकिएको छैन ।
लगातारको वर्षाका कारण त्रिसुुली नदीको बाढीका कारण नदिको वहाव तिव्र हुनुका साथै पानी धमिलो भएका कारण खोजी कार्यमा कठिनाई भएको बताइएको छ । खोजी कार्यमा नेपाली सेना, सशस्त्र प्रहरी तथा नेपाल प्रहरीका दुई सय बढी जनशक्ति परिचालित छन् ।
शनिवार बिहान देखि नै खोजी टोली पानीभित्रको दृश्य देखिने सोनार क्यामरा, वाटर ड्रोन सहित खटिएका छन् । उक्त प्रविधि तथा गोताखोर सहितको टोली खोजी कार्यमा संलग्न भए पनि सफल भने हुन सकेका छैनन् ।
गत शुक्रबार बिहान ३ बजेर ३० मिनेटमा वीरगन्जबाट काठमाडौँतर्फ आउँदै गरेको बागमती प्रदेश ०३–००६ ख १५१६ नम्बरको डिलक्स र काठमाडौँबाट गौरतर्फ जाँदै गरेको बाग्मती प्रदेश ०३–०११ ख २५९५ नम्बरको अर्को डिलक्स बस सिमलताल नजिकै लेदो सहितको पहिरोमा परी त्रिसुली नदीमा खसेको थियो । दुुवै बसमा गरि कुल ६० जना माथि रहेको अनुमान गरिएको छ ।
यसैबिच भरतपुर–२८ गोलाघाट स्थित नारायण नदी किनारमा एक शब फेला परेको छ । उक्त शब सिमलतालमा पहिरोले बगाएको बसको यात्रुको भएको पुष्टि भएको छ । शवको साथमा भेटिएको कागजपत्रको आधारमा उनी भारतीय नागरिक ऋषि पल साह रहेको प्रहरीले जानकारी दिएको छ ।
